وقعت على بيان البرادعي وإلّا...؟!!

بسم الله الرحمن الرحيم

كل ما أسأل أي حد : وقعت على بيان البرادعي؟ بألاقي ردين، إما يقول لي: أنا ماليش في الحاجات دي (زي ما أكون بأقول له قلة أدب). أو يقول لي: يا عم ماتوديناش في داهية، أنا مش ناقص يقبضوا علي (قال يعني هايسيبوا كل اللي وقعوا ويمسكوه هو). أنا لما فكرت شوية قلت هو مصر اللي بنحبها ماتستاهلش نضحي عشانها؟!! وإفرض قبضوا عليا، ماهو جدودنا ماتوا عشان يحرروا الأرض اللي إحنا عايشين على خيرها. معنى كده إن الإنجليز لو كانوا على أيامنا ماحدش كان هايقاومهم؟! أنا مش بأقول إن البرادعي هو الأمل وهو الرجل المناسب في المكان المناسب، دي وجهة نظر ممكن تخالفني فيها بس لما يكون عندك وجهة نظر.. مش خايف!! أنا اللي فاقعني إن فيه ناس مش شاغلين نفسهم أصلاً وخايفين يقولوا رأي، يعني على كده طول سنين تعليمنا كنا كل يوم الصبح نقول "بلادي لك حبي وفؤادي" ومش حاسينها من جوانا! بعد كل ماتش المنتخب يفوز فيه بنطلع نهلل وخلاص، مش عشان مصر كسبت! كل الأغاني الوطنية دي معمولة عشان وقت البطولة الأفريقية، أو عشان مطرب يشتهر على حس مصر! ما أظنش إن دول المصريين، ولو إحنا كده متهيقلي البلد دي تستحق أحسن مننا.
طيب ليه زعلنا لما كرامة المصري إتهانت من الجزائريين؟! إذغ كان المصري كرامته متهانة على أرضضه بدليل إنه مش عارف يقول رأي وخايف. إلّا زعلنا على كرامة مصر؟ مصر اللي كان أعدائها بيعملوا لها ألف حساب دلوقتي بتتهان ومن مين؟! من الجزائر اللي لسه محتلاها فرنسا. فيه ناس هايزعلوا ويقولوا: "لأ.. مصر فوق الجميع". صح.. مصر فوق الجميع وهاتفضل فوق الجميع بس للأسف الواقع بيقول غير كده.. من غير ما أدخل في تفاصيل اللي خلانا كده. أعتقد إن فيه فرصة ماجاتش لأي جيل قبلنا وهي إن لأول مرة مستقبل مصر ممكن نكتبه بإيدينا، سواء مؤيد للبرادعي، أو جمال مبارك، أو أي حد، المهم تقول رأيك بصراحة من غير ما تخاف وتبقى مصلحة مصر هي الهدف.
لكن الناس اللي خايفين، خليكوا خايفين والدنيا بتتحرك حواليكم. هي دي صح وجهة نظر ولازم نحترمها، وأنا فعلاً محترمها.. بس يا أخي ماتجيش بعد كده تقول مصر. دا إنت أصلاً مش عايز تشغل بالك بيها ومش ناوي تضحي عشانها.. وبنسأل إزاي فيه ناس بتتهرب من الجيش وخدمة الوطن؟! وليه الشباب بيهاجر بره؟!
أعتقد السؤال المفروض يكون: "فين الإنتماء اللي إتقتل جوانا؟"
وشكراً