أخي المواطن، زعق براحتك.. ما هاينوبك إلّا فقعك

بسم الله الرحمن الرحيم

فجر لقاء النادي الأهلي مع نادي إنبي ردود أفعال كثيرة، فقد أدى المستوى المتدني للحكم إشتعال التصريحات بين مؤيدي القلعة الحمراء ومؤيدي القلعة البيضاء يتهم كل منهما الآخر بتواطؤه مع الحكم، وفي تعليق للجنة الحكام على ما حدث: التحكيم في مصر بخير، ومادام الكل معترض على قرارات الحكم يبقى نجح في إدارة اللقاء.
دا اللي حصل بعد ماتش كورة عادي جداً في الدوري المصري، الكل بيزعق والمسئول مش سامع حد ومقتنع إنه صح. حكم مش عاجب أي طرف يبقى إزاي نجح في إدارة اللقاء؟! بتكلموا مين يا ناس؟! إحنا مش هنود.
لما فكرت في الموضوع من ناحية تانية لقيت إن دا الواقع اللي عايشينه، تخبط وعدم إستقرار وزعيق وفي الآخر مافيش حاجة بتتغير. ماحدش عارف حاجة، ومافيش حد تسأله. طيب دا من إيه؟ ليه كل واحد شايف تفسه مظلوم ومش واخد حقه؟ ليه دايماً نلوم الناس واحنا ساعات نعمل زيهم؟ ويمكن اللي بنلومهم حاسين برضوا بالظلم.دا لأننا فعلاً مش واخدين حقنا.. كل واحد بيقنع نفسه إنه ممكن يتكلم، فيتكلم بس ماحدش يسمعه، وحتى لما يتكلم بيغلط عشان يسمّع الناس فيبعدوا عنه. ماحدش عارف حقوقه، ولما يبقى في إيدنا سلطة بنجور على حقوق الأضعف مننا. فين القانون؟!! القانةن يسهل إختراقه عندما يعم الفساد. ممكن شيء بسيط يعمل موجة عالية جداً لإلهاء الناس عن واقعهم، لإلهاء الضعيف أنه يُداس على رقبته كل يوم ليتسلق آخرونبطرق غير شرعية

للقمة، ولإلهاء القوي أنه يدوس كل يوم على رقاب الضعفاء.. أصبحنا عبيد لقمة العيش. لمصلحة من هذا؟! ألم يحين الوقت للتغيير؟ ماجاش الوقت يا بلد تتغيري؟! أو بمعنى أصح ترجعي لمكانتك اللي المفروض تبقي عليها.
ليه مابقاش يهمنا غير الكورة والفنانين؟ عشان ننسى همنا؟! طيب ليه مانفتكرش همنا عشان نغيره.. وإلّا رضينا بالهم؟!!
البلد دي مش بتاعت الحرامية اللي بيهربوا فلوسها بره في حساباتهم، ولا بتاعت الكبار الفاسدين.. البلد دي بتاعتنا إحنا، إحنا في إيدينا نوصلها للقمة. ماتقوليش إزاي!! إحنا 80 مليون، سيبك من كل الأسماء الموجودة ع الساحة دلوقتي، مافيش حد منن يقدر يمسك البلد ويصلحها وإحنا معاه؟! ماتقوليش السلطة بتفسد الإنسان. لأ.. إحنا في إيدنا نعيد كتابة تاريخ البلد وإحنا اللي نقرر مستقبلها، بس الموضوع محتاج إرادة. اللي للأسف ماتت عند جيل إتعود يطاطي.. يا أخي حاول تقول لأ، شوف حالك وحاول تصلح، إسأل نفسك: هل أنت راضِ عن حالك؟ ماتقوليش أنا بأكل وبأشرب وبأنام، الحيوانات بتعمل كده وهي راضية، وانت ربنا ميزك بالعقل. نقول الحمد لله على كل شيء صح، بس مانرضاش بالغلط.
في الأول أنا قلت إحنا مش هنود(تهكماً ورمزاً إلى الغباء)، لكن في الواقع ياريتنا نكون زي الهنود.. الهنود اللي كانوا أسوأ مننا بمراحل وكان العالم كله بيسخر منهم أصبحوا الآن بلد صناعية في تقدم ويوماً ما سيقف لها العالم إحتراماً.. وإحنا لسه واقفين مكاننا.
ماحدش هايصلح حال البلد دي غيرنا إحنا.. فبدل ما نشتكي ونلوم بعض نبدأ نعمل حاجة عشان التغيير.
وشكراً