آسف يا والدي

بسم الله الرحمن الرحيم

عارفك زعلان ومتضايق عشان للظالم بأقول لأ
خايف عليا مش طايق فكرة في يوم في سجن أتزق
حقك يا والدي تتخانق معايا لما أطالب حكومتي بحق
خوفك هايبقى مش فارق بكرة هانحط إيدينا في الشق
نشحت ونسرق ونتقاتل ونتحارب على اللقمة
غابة أشجارها بتتمايل فيها وحوش مافيش ذمة
وكبارها ريقهم سايل بكروش مايشبعوش دم ولحمة
وغلبان للهم شايل يتعب ويشقى وملبسينه عمة
قول لي ياوالدي لو يرضيك الحال أطلع أهلل وأقول شعارات
أنافق عشان شوية مال أبوس مسئول مسئول وأخدم باشاوات
دا أول ما سمعت الكرامة بتتقال على لسانك وأفعالك كانت دلالات
وإلّا أسكت وأقول الحال عال عايش بجسمي وعقلي مات
أصل السكوت دلوقتي حرام يا أكون راجل يا أكون عيل
لما الرئيس يقول كلام يأفلم علينا ويتخيل
ومايطلعش ولا عاقل يقول الصح ويحلل
يبقى عليكي يا دنيا السلام وأحسن لي أدخل أقيل  (آخذ قيلولة)
حاولت يا والدي ماقدرتش أكون سلبي وماتكلمشي
عملن كأني ماسمعتش ومش شايفه قصاد وشي
بجح بيجر في خناقي يضرب ويقول لي ماعملشي
هو عشان بحب بلدي أبقى بأزن على خراب عشي
ما هو قالها بلسانه فيه حرية  وإلّا دا كلام بيرجع فيه
وإلّا حرية كروية لأي نادي أنتمي ليه
قال على الشباب فوضوية عشان قالوا مش راضيين بيه
حبسهم مع الحرامية وحرمهم من الإمتحانات وأهو دراع يلويه
فاكر إنه بيسيطر لما بالعنف يتحكم
مبدأ عمره ما يتغير في قلب شباب مهما إتألم
ولما من ظلمك نتحرر هانتحسن ونتقدم
ونبدأ نخطط ونسطر ورقة بيضا فيها نحلم
 آسف يا والدي طلع لي صوت غصب عني لما شوفت العار
نصدر غاز لليهود ونحبس إخواتنا بجدار
والعروبة دي شبعت موت وحواليها ألف حصار
يا والدي ماتستناش مني وعود أنا هاتكلم مهم صار
ما أقدرش أكسّر ليك كلمة بس إنت ربيتني ع الصح
آخد حقي من الظلمة وأبقى شجاع يوم ما الشجاعة تشح
ولا أستني حكومة ولا قمة يغيروا حالي من حزن لفرح
على قد عمري عشت طواريء من غير توضيح من غير شرح
ويوم ما أتكلم يتقال لي  إسكت مالكش حق تقول
وإنت يا والدي تكتب لي  إحذر يا ولدي بطش إيد مسئول
وتوعدني وتحلف لي  هاتزعل لو كلامي يطول
آسف يا والدي ماتزعلشي ابنك واقف في وش الغول
سيبني يا والدي أحاول وأهو يمكن حاجة تتغير
عايش الحلم وأنا قايل نفسي البلد دي تتنور
ومهما في طريقي هاقابل صعوبات عمري ماهتدوّر
دا انت قلت ع كلامي هايل فليه أسكت وليه أبرر
يمكن أنا اللي هايرجع كرامة إتهانت من بدري
سني صغير وإيه يمنع شافني الأمن طلع يجري
أرجع حقنا "المصلوب" في لبنان إتلمّوا ع المصري
وفي الخليج بنتقطع لأجل دينار أو ريال يغري
وولي أمري قاعد في قصر مش عارف وخايف يحميني
والحمد لله جاب لنا النصر بكأس الأمم ينسيني
إهانة شعبين بدون حصر مصري جزايري ع العروبة تقسيني
كرامة المصري من كرامة مصر وعملت إيه لمروة الشربيني
وعايزني أسكت وماتكلمش يا والدي دا الحقيقة مرة
ومنين هاأجيب لولادي الوش وأقول دا بلدكم بلد حرة
هاتكلم بس ماتزعلش دا زعلك بيقطعني من جوة
وإدعي لبلدنا
أصله زعيم بمليون وش ماطلعش راجل ولا مرة