قالوا لي: بتحب مصر؟! قلت: مش عارف

بسم الله الرحمن الرحيم
 

** ملحوظة: العنوان مقتبس من قصيدة للشاعر تميم البرغوثي.

قالوا لي: بتحب مصر؟! قلت: مش عارف
قلت: بحبها من غير ما أتحير
ولو دا حالها بينا يتغير
قلت وكلي أمل: "إحنا اللي هانغير"
قالوا الكبار: أسكت إنت يا صغير
إيه جابك بيننا حاسب لا تتعور
مش إنت اللي هاتغير بلد من أيام الفراعنة بتتزور
قلت: هاغيرها وأنا حالف
قالوا لي: بتحب مصر؟! قلت: مش عارف
قلت بحبها.. بلادي بلادي
سجنوني وتهمتي بحبها طعت أنادي
ولسه حبها ساكن في فؤادي
جوايا سؤال بيتكرر بصوت هادي
خايف يطلع لا يِشَمِّت الأعادي
طريق الصح فين في الدنيا دي؟
خايف أطلع ماشي عكس الطريق مخالف
قالوا لي: بتحب مصر؟! قلت: مش عارف
أنا مصري بسيط عايش عشان عيالي
أجيب لهم اللقمة وأنام مرتاح بالي
طابور العيش خد من عمري أيام وليالي
راضي وماليش غير ربي أشكي له حالي
سمعت كلام في زحمة المترو إتحكى لي
إن الكبار بيسرقوا الغلابة أمثالك وأمثالي
وإيه في إيد بسيط زيي بيكمل شهره سالف
قالوا لي: بتحب مصر؟! قلت: مش عارف
أنا شاب حلمه إتنسى في زحمة الشارع
مسجون في فكر مجتمع كله موانع
مستقبل مظلم زي نهار فيه نور الشمس مش طالع
أرنب في غابة فيها الأسود بتتصارع
بين الحلال والحرام الصح عن عيني ضايع
بأعيش في الوهم وبأبعد نفسي عن الواقع
حياتي روتين بيتكرر زي شريط سافف
قالوا لي: بتحب مصر؟! قلت: مش عارف
قلت: بحبها بحواريها وبناسسها الطيبين
عم محمد وعم مرقص ع القهوة مبسوطين
يحكّوا ويضحكوا ويلعبوا عشرتين
على الحلوة والمرة الناس متجمعين
ماحدش ينام ويسيب جاره حزين
إزاي ما أحبهاش! طاب ألقى زي ناسها فين؟!
وأنا وسطهم عمري ما أكون خايف
قالوا لي: بتحب مصر؟! قلت: دا أنا لأنغام حبها عازف